ပြည်သူတွေ ကတိုင်းပြည်မှာလုပ်နိုင်ကိုင်နိုင်မဲ့သူတွေ ကို ရွေးချယ်တင်မြှောက်လိုက် ပါပြီ။ မြန်မာရွေးကောက် ပွဲလွန် ကာလ အစိုးရသစ်သည် ပွင့် လင်းလွတ်လပ်သော check and balance ရှိသောဈေးကွက်စီးပွားရေး စနစ်ကို အကောင်အထည်ဖေါ်ကြလိမ့်မည် ယုံကြည်နေကြပါတယ်။ စာရေးသူဟာ ကုန်သွယ်ရေးနယ်ပယ်မှာ နှစ်ပေါင်းများစွာကျင်လည်လုပ်ကိုင်ခဲ့ဘူးတာကြောင့် စီးပွားရေးမှာအရေးပါလှတဲ့ ကုန်သွယ်မှုလုပ်ငန်း အခြေ အနေကို တီးမိခေါက်မိအနည်းငယ်ရှိပါတယ်။ စာနယ်ဇင်းတွေမှာ ကုန်သွယ်မှုလုပ်ငန်းအကြောင်းတွေ ရေးသား ဖေါ်ပြလာရင်လည်း စိတ်ပါဝင်စားစွာလေ့လာဖတ်ရှုခဲ့တာကြောင့် အများရဲ့လိုလားချက်တွေဟာ ဘာတွေလဲ ဆိုတာ သဘောပေါက်နားလည်နေပါတယ်။ ပြည်သူတွေဘာဖြစ်ချင်လဲဆိုတာ အမြဲဆွေးနွေးနားထောင်နေတာ ပါ။ အစိုးရ၀န်ထမ်းဖြစ်ခဲ့ဘူးပေမဲ့ချမှတ်တဲ့ မူဝါဒတိုင်းဟာအမှန်လို့မပြောလိုပါဘူး။ စာရေးသူတို့အားလုံး ဒီမို ကရေစီ လမ်းကြောင်းပေါ်ရောက်လာပြီလေ။ ဒီနေရာမှာအများမသိကြတာကတော့ မြန်မာကုန်သည်အချို့ (အချိုး အစားနည်းပါတယ်၊ အကုန်လုံးမဟုတ်ပါ) ဟာစီးပွားရေးကျင့်ဝတ် (business ethics) စောင့်ထိန်းလိုက်နာမှု အပိုင်းမှာအားနည်းပါတယ်။ အများစုကတော့ ဒေသတွင်းရှိ ကုန်သည်တွေနဲ့ ယှဉ်ပြိုင်နိုင်စွမ်းအား မရှိသေးပေမဲ့ နောင်တက်လာမဲ့အစိုးရသစ်ကတော့ ဒီအပိုင်းတွေမှာတိုးတက်လာအောင် လုပ်ပေးသွားလိမ့်မယ်လို့ ယုံကြည်နေ ပါတယ်။
စိတ်ဝင်စားစရာတစ်ခုကတော့ ၂၀၁၅ခု AFTA ၀င်လာတဲ့ အခါ ပြည်တွင်းလုပ်ငန်းတွေ ဘာတွေဖြစ်လာနိုင် တယ်၊ ဘာတွေပြင်ဆင်ထားရမယ်၊ ယုဉ်ပြိုင်နိုင်စွမ်းအားတက်လာအောင်လုပ်ရမယ်၊စ သည်ဖြင့် ဘက်ပေါင်းစုံ ကလေ့လာသုံးသပ်တင်ပြထားတာကို ဂျာနယ်စာနယ်စင်းတွေမှာဖတ်ရပါတယ်။ မြန်မာကုန်သွယ်မှုဟာ တရား ၀င်ကော၊ တရားမ၀င်ကော ရောပြွန်းနေတာဖြစ်ပါတယ်။ တရားမ၀င်ကုန်သွယ်မှုကို တရားဝင်လမ်းကြောင်း ပေါ်ရောက်အောင်လည်း တင်ခဲ့ဘူးပါတယ်၊ တင်လျက် လည်းရှိနေပါတယ်။ အချို့သောလုပ်ငန်းတွေကို အစိုးရ အနေနဲ့ တရားဝင်လုပ်ခွင့်ပြုလိုက်တော့ တရားဝင်လမ်းကြောင်းပေါ်ရောက်လာတာလည်း တွေ့ရပါတယ်။ အချို့ကတော့ စီးပွားရေးကျင့်ဝတ် မရှိကြတာပါ။ အခွန်မပေးလိုတာတစ်ခုတည်းနဲ့ တရားမ၀င်ကုန်သွယ်မှုကို လုပ်ကြတာပါ။ အခွန်မပေးရ တဲ့အခါ ပြည်တွင်းအရောင်းအ၀ယ်မှာ ယုဉ်ပြိုင်နိုင်စွမ်းအားတက်လာနိုင်တော့ တရားဝင်လုပ်နေသူတွေတောင် တရားမ၀င်လမ်းကြောင်းကိုလျှောက်ချင်ကြတယ်။
ပုဂ္ဂလိက ပိုင်းမြှင့်တင်ရေး နဲ့ပတ်သက်ပြီးစာရေးသူအမြင်ကိုတင်ပြရရင် တပ်မတော်အစိုးရလက်ထက်မှာ နိုင်ငံတော်ကအားကိုးအားထားပြုလို့ရနိုင်မဲ့ တိုင်းရင်းသားလုပ်ငန်းရှင်ကြီးတွေမွေးထုတ်ခဲ့ပါတယ်။ ဆန့်ကျင် ဖက် အင်အားစုတွေအမြင်မှာတော့ တပ်မတော်အစိုးရရဲ့ cronies တွေပေါ့။ ဒါပေမဲ့သူတို့ရဲ့ လုပ်ကိုင်နိုင် စွမ်းအားဟာ နိုင်ငံတကာအဆင့်ရှိပါတယ်။ cronies တွေဆိုပြီး အင်အားကြီးနိုင်ငံတွေက ပိတ်ဆို့မှုတွေ လုပ်လို့ သာအားနည်းနေရတာပါ။ နိုင်ငံတော်ရဲ့အဓိကကျတဲ့ ပရိုဂျက်လုပ်ငန်းကြီးတွေ အကောင် အထည်ဖေါ်ဖို့ တာဝန်ပေးအပ်ခြင်းခံရပါတယ်။
ဆယ်စုနှစ် ၂ခု ၃ ခုအတွင်းဒီလုပ်ငန်းရှင်တွေရဲ့ လုပ်ကိုင်ဆောင်ရွက်မှုများကိုအစိုးရကကော ပြည်သူတွေ ကကော လက်ခံကြပါတယ်။ ရန်ကုန်ကဆိပ်ကမ်း၊ လေဆိပ်၊ သယ်ယူပို့ဆောင်မှုအပိုင်း၊ ပြည်နယ် ကလမ်းတွေ ကိုကြည့်ပါ။ အစိုးရကော ပြည်သူကော နှစ်သက်စွာအသုံးပြုနေကြပါတယ်။ ပြည်သူအပေါ်ဖိစီးမှု မရှိအောင် ဆောင်ရွက်နူိုင်တာကြောင့်လက်ခံကြတာပါ။ ဒီလုပ်ငန်းရှင်တွေဟာ တစ်နပ်စားအကြံမရှိပဲ လုပ်ငန်းတွေကို အောင်မြင်စွာအကောင်အထည်ဖေါ်ဆောင်ရွက် နိုင်တာကြောင့် အစိုးရနဲ့ ပြည်သူတွေရဲ့ ယုံကြည်မှုကိုရခဲ့ တာပါလို့မီးမောင်းထိုးပြချင်တာပါ။ ဒီလိုပဲကုမ္ပဏီအချို့ဟာနိုင်ငံတော်ကယုံကြည်လို့ တာဝန်ပေးခဲ့တာကိုပြီး ကပျစ်ကပျက်ကချော်လုပ်မိခဲ့တာကြောင့်ယုံကြည်မှု မရတော့ပဲမြောင်းထဲဆင်းသွားရတာကိုလည်း တွေ့နေရ ပါတယ်။ ဒီ tycoon ကြီးတွေဟာ သူတို့သည် မည်မျှပင်ပံ့ပိုးမှုများရပါစေ အရည်အချင်း မရှိရင် ဘယ်လို နည်းနှင့်မျှ လုပ်နိုင်ကိုင်နိုင်စွမ်းရှိသည့် စီးပွားရေးသမားဘ၀ကို ရောက်မလာနိုင်ပါ။ တချို့လူကြီးသားသမီး တွေမအောင်မြင်ပဲမှေးမှေးမှိန်မှိန်ပဲ နေနေတာကို တွေ့ ရပါတယ်။
ယုံကြည်မှုတည်ဆောက်တဲ့အခါ လုပ်ရည်ကိုင်ရည်ရှိသူတွေရေပေါ်မှာ ကျန်နေတာ အထင်အရှားပါ။ ဒီမို ကရေစီအစိုးရလက်ထက်မှာ တော့ ဖါးတာတွေ၊ ကပ်တာတွေ၊ ရှိချင်မှ ရှိမှာ ပါ။ bias လည်းရှိ ချင်မှ ရှိမှာပါ။
အရည်အချင်းရှိသူတွေဘယ်သူတွေလဲဆိုတာပေါ်လာတော့မှာပါ။ဘယ် လိုမှမယှဉ်နိုင်သူတွေတော့ မြောင်းထဲ ရောက်သွား နိုင်ပါတယ်၊ ဒါဟာစီးပွားရေးကျင့်ဝတ်နဲ့အများကြီးသက်ဆိုင်နေပါတယ်။ အချို့သောကုမ္ပဏီများ သည် စီးပွားရေးကျင်ဝတ် ကိုလိုက်နာကြ လိုသော်လည်းအများ မိုးခါးရေသောက်သည့် အထဲမှာ လွင့်မျောရင်း ဖြစ်နေပြီး ဗြုန်းဆို အစိုးရအသစ် အလှည့်အပြောင်းရောက် လာသည့်အခါ ခေါင်းတွဲ ကို အမြန် ပြန်လှည့်ကြ ရမှာဖြစ်သော် လည်း နောက်မကျသေးကြောင်း ကို တင်ပြ လိုပါတယ်။
ကုန်သွယ်မှုနယ်ပယ်မှာစာရေးသူတာဝန်ယူခဲ့တဲ့ ၂၀၀၆-၂၀၀၇ ခုနှစ်လောက် ကစပြီး တရှိန်ထိုးဖွံဖြိုးတိုးတက် လာခဲ့ တာကိုအောက်ဖေါ်ပြပါ ဇယား အရသိရှိ နိုင်ပါတယ်။
ကုန်သွယ်မှုအပိုင်းလျှင်မြန်စွာတိုးတက်လာတာဟာ regulation လုပ်ရမဲ့အပိုင်း Deregulation လုပ်ရမဲ့အပိုင်း တွေ ကို မှန်ကန်စွာလုပ်ကိုင်ဆောင်ရွက်ခဲ့လို့ပဲဖြစ်တယ်လို့စာရေးသူ ဆိုချင်ပါတယ်။ ဒီမိုကရေစီနိုင်ငံတွေမှာ တောင်လူထုကြိုက်သည်ဖြစ်စေ၊ မကြိုက်သည်ဖြစ်စေ regulation နဲ့ deregulation တွေကိုလုပ်ကြရပါတယ်။ အမေရိကန်နိုင်ငံလိုမျိုးတောင်ပြည်သူလူထုလုံခြုံမှုအတွက် ဒီမိုကရေစီနည်းလမ်းမကျတဲ့အလုပ်တွေကို လုပ်ခဲ့ ကြရပါတယ်။ ဂွာတာနာမိုအကျဉ်းထောင် ကိစ္စကိုကြည့်ပါ။ ကောင်းမွန်သောငွေကြေးစနစ်ချမှတ်ထားသော် လည်း business ethics မရှိတဲ့ CEO တွေဟာကိုယ်ကျိုးကိုယ်ရှေ့တန်းတင်ခဲ့တာကြောင့် ဘဏ်တွေတော်တော် များများဟာပြုတ်သွားခဲ့ ကြပြီး ဟိုးလေးတကျော်ကျော်နဲ့ ဖြစ်ခဲ့ကြတာကိုလည်းကြားကြမှာ ပါ။
လွန်ခဲ့သောနှစ် ၂၀ ကမြန်မာ ပဲမျိုးစုံအခြေနေကိုကြည့်ကြရအောင်။ ပဲမျိုးစုံကို အရှိန်အဟုန်နဲ့စိုက်ပျိုးထုတ်လုပ် ဖို့ခြေလှမ်းပြင်နေချိန်၊ အိန္ဓိယ၊ စင်ကာပူကကုန်သည်တွေမြန်မာပြည်မှာခြေချင်းလိမ်လျက်ရှိပြီး မြန်မာကုန်သည် တွေတောင်သိပ်မသိသေးတဲ့ ဘယ်နယ်ကပဲအရည်အသွေး ဘယ်လိုကောင်းတယ်၊ အထွက်ဘယ်လောက်ရှိ တယ်ဆိုတာကအစလက်လှမ်းမီ သိရှိနေကြပါပြီ။ ဈေးကွက်မှာ ဈေးကစားနိုင်အောင်ပေါ်ပေါ်ထင်ထင်လုပ်နေ ကြချိန်ပါ။ အဲဒီအချိန်ကမြန်မာကုန်သည်တွေဟာအိန္ဓိယဈေးကွက်မပြောနဲ့ ပြည်တွင်းဈေးကွက်မှာ တောင် နှံ့နှံ့စပ်စပ်မသိ ကြသေးဘူး။ အဲဒီအချိန် ကမြန်မာကုန်သည် ကြီးတွေက “ အိန္ဒိယကုန်သည်တွေ မြန်မာပဲ အကြောင်းနှံ့နှံ့စပ်စပ်သိနေကြတာကို ပြောနေကြပြီးဘာမှလုပ်ဖို့မစဉ်းစားကြပါ။ ငါတို့တော့သူတို့ ပြုသမျှနုရ တော့မှာပါလား“ လို့ပြောစမှတ်တောင်ပြုခဲ့ကြပါတယ်။ မနေသာတော့သည့် စာရေးသူတို့ဟာ သတင်း အချက် အလက်နဲ့ပတ်သက်သည့်အစီအမံများကို ဌာနတွင်းမှာအကောင်အထည်ဖေါ်ခဲ့ကြပြီး ပဲဈေးကွက် သတင်း အချက်အလက်နည်းပညာဖွံဖြိုး လာစေရန်လုပ်ဆောင်ပေးခဲ့ကြပါတယ်။
ယနေ့ ၂၁ ရာစု မြန်မာကုန်သည်တွေဟာ အိန္ဒိယက ပဲနဲ့ ပတ်သက်တဲ့သတင်းအချက်အလက်ကို အကုန်သိနေ ကြပြီး တချို့ကုမ္ပဏီဆိုရင် အိန္ဒိယမှာတောင် ကုမ္ပဏီတွေရုံးခန်းတွေဖွင့်ထားပြီးကုန်သွယ်မှုကို သွက်လက်စွာ လုပ်ကိုင်လျှက်ရှိကြပါတယ်။ ဒါဟာဘာကိုပြောချင်လဲဆိုတာ ပြည်ပကုမ္ပဏီတွေမြန်မာပဲဈေးကွက်မှာဝင် ရောက် ချယ်လှယ် လုပ် ကိုင်မဲ့ အရေး ကို သတိပြုမိ လာတာကြောင့် ကုန်သွယ်မှုအပိုင်းမှာ လိုအပ်တဲ့ regulation တွေ ကို အချိန်မီ ပြဌါန်းချမှတ်ဆောင်ရွက်ခဲ့ရပါတယ်။ ဒါကြောင့်လည်း မြန်မာကုန်သည်တွေလွတ်လွတ်လပ်လပ်နဲ့ ပဲမျိုးစုံ ကုန်သွယ်မှုကို လုပ်ကိုင်လာခဲ့ ကြတာ ၂၀၀၈ ခုနှစ် မှာ ပဲ scandal တစ်ခုပေါ်ပေါက်ခဲ့ပါတယ်။ အစိုး ရကကိုင်တွယ်ဖြေရှင်းခဲ့ရပြီး အတွေ့အကြုံရှိပြီးလုပ်ငန်းကျွမ်းကျင်တဲ့ပဲကုန်သည်တွေ ဘ၀ပျက်ခဲ့ကြရတာကို အများ အသိပါ။ အစိုးရက၀င်ရောက်ဖြေရှင်းရတော့ Regulation ဆိုတဲ့ အပိုင်းကပါ လာရရော။ ဆိုချင်တာက နှစ်ပေါင်းများစွာအစိုးရက regulate မလုပ်ပဲ ဈေးကွက်စီးပွားရေးကိုဖေါ်ဆောင်ကြ လိမ့်မယ်ဆိုတဲ့အသိနဲ့ လွှတ်ထားခဲ့ပေမဲ့ business ethics အပိုင်းမှာ အားနည်းကြတဲ့ ကုန်သည်တွေကြောင့် regulation ဆိုတဲ့ အပိုင်းက၀င်ပါလာရတာကိုတွေ့ မြင်သုံးသပ်ရမှာပါ။
စာရေးသူပြောချင်တာက စီးပွားရေးမှာ အရေးပါတဲ့ ကုန်သွယ်မှုအပိုင်းမှာ ဒီကနေ့ ရေပမ်းစားနေတဲ့ check and balance ဆိုတာကို တိုင်းရင်းသားကုန်သည်တွေကပဲ ဖေါ်ဆောင်လုပ်ကိုင်သွားရမှာပါ။ regulation လုပ်ခြင်း၊ deregulation လုပ်ခြင်းဟာ ကုန်သည်လုပ်ငန်းရှင်တွေရဲ့ တစ်နပ်စားအကြံကိုဖျောက်ပြီး စီးပွားရေးကျင့်ဝတ်နဲ့ အညီလုပ်ကိုင်ဆောင်ရွက်သွားမှသာလျှင်ကွယ်ပျောက်သွားမှာဖြစ်ပြီး နိုင်ငံတကာမှာ ယှဉ်ပြိုင်လုပ်ကိုင်နိုင်တဲ့ လုပ်ငန်းရှင်တွေ တိုးပွားများပြားလာမှာဖြစ်ပါတယ်။
No comments:
Post a Comment