စီးပွားရေးပဲ့တင်သံများ

လင်းနို့များဟာ ပဲ့တင်သံကို နားထောင်ပြီး လမ်းကြောင်းရှာဖွေ ပျံသန်းကြရပါတယ်။ စီးပွားရေး ပဲ့တင်သံများကိုနားထောင်ပြီး တိုင်းပြည်စီးပွားရေး ဖွံ့ဖြိုးတိုးတက်မှုလမ်းကြောင်းကို ရှာဖွေလျှောက်လှမ်းရန် လိုပါတယ်။ စီးပွားရေးပဲ့တင်သံ တွေဟာ စီးပွားရေးသမားတစ်ဦးချင်းထံမှ ထွက်ပေါ်လာခြင်းဖြစ်ပြီး သူ၏ အမြင်အယူအဆများကိုသာ လွတ်လွတ်လပ်လပ် ဖေါ်ပြခြင်းသာ ဖြစ်ပါတယ်။ မှန်ခြင်း၊ မှားခြင်းကိုတော့ စာဖတ်သူပဲ လေ့လာသုံးသပ်ဝေဖန်နိုင်ပါတယ်။

ပထမဆုံး စီးပွားရေးသမားရဲ့ နှုတ်ဖြတ်အခွန် (withholding tax)နှင့် ပတ်သက်တဲ့ ပဲ့တင်သံကတော့ " နှုတ်ဖြတ်အခွန် ဟာ ပြည်တွင်းမှာ ရောင်းဝယ်ကြတဲ့ transaction များအပေါ်မှာ ကောက်ခံခြင်းဟာ သင့်လျော်မှန်ကန်ပါတယ်။ နိုင်ငံသားတိုင်း ဟာ အခွန်ပေးဆောင်ရမဲ့ တာဝန်ရှိကြပါတယ်။ ပြည်ပက သွင်း လာတဲ့ သွင်းကုန်ပစ္စည်းအပေါ်မှာ ကောက်ခံတာကိုတော့ စောဒကတက်ချင်ပါတယ်။ နိုင်ငံခြားက ပစ္စည်း ရောင်းသူ supplierဆီက withholding tax ကောက်တာဖြစ်တယ်လို့ ဆိုပေမဲ့ တကယ်တော့ ကုန်ဝယ်သူ မြန်မာကုန်သည်ကပဲပေးရတာပါ။ အဲတော့ မြန်မာကုန်သည်တွေပဲ နှုတ်ဖြတ်အခွန်၊ ကုန်သွယ်ခွန်၊ ရောင်းခွန် တွေနဲ့ ရင်ဆိုင်ကြရပြီးနောက်ဆုံးတော့ စားသုံးသူအပေါ်ပဲ ရောက်တော့တာပါပဲဗျာ"။

ဒုတိယပဲ့တင်သံကတော့ " မြန်မာနဲ့ double taxation လက်မှတ်ထိုးထားတဲ့နိုင်ငံ (၅)နိုင်ငံရှိပါ တယ်။ စင်ကာပူကို ဥပမာ ပေးပါရစေ။ စင်ကာပူမှာ တည်ထောင်ထားတဲ့ ကုမ္ပဏီဟာ မြန်မာဖွင့်ထားရင် ဖြစ်စေ၊မြန်မာတစ်ဦးဦး ပါဝင်ရင်ဖြစ်စေ၊ double taxation ခံစားခွင့် အကြုံးမ၀င်ဘူး။ မြန်မာ ကုန်သည်တွေနိုင်ငံကြီးတစ်ခုရဲ့ စီးပွားရေးပိတ်ဆို့မှု ဆက်ရှင်ကိုကျော်လွှားနိုင်အောင် ပြည်ပမှာ ကုမ္ပဏီတွေ ဖွင့်ကြဖို့သက်ဆိုင်ရာကပဲ တိုက်တွန်းခဲ့တာလေ။ အခုတော့ စင်ကာပူနိုင်ငံသားတွေ ကောင်းစားအောင် လုပ်ပေးနေသလို ဖြစ်နေပြီ။ အဲဒီကုမ္ပဏီ board of directors တွေထဲက မြန်မာတွေထွက်ပြီး စင်ကာပူ နိုင်ငံသားတွေကိုtransaction တစ်ခုလုပ်တိုင်း ၁%-၁.၅% စသည်ဖြင့် ခံစားခွင့်ပေးပြီး board of directors စာရင်းကိုပြောင်းလဲနေကြရပါတယ်။ ၃.၅% ထက်စာရင် သက်သာရာ သက်သာကြောင်း လုပ်နေကြ ရတာပါ။ ဒါကdouble taxation ခံစားခွင့်ကို ရချင်လို့ပါ။ မြန်မာကုန်သည်တွေ အခုဆိုရင် စင်ကာပူမှာ ကုမ္ပဏီဖွင့်ချင်တိုင်း ဖွင့်လို့မရတော့ပါဘူး။

ဒီအယူအချက်ဟာ လမ်းကျသလား၊ လမ်းမကျဘူးလား သုံးသပ်စေချင်ပါတယ်။ တဆက်တည်းပြောချင်တာက စီးပွားရေးပိတ်ဆို့မှုကြောင့် မြန်မာကုန် သည်တွေဟာ ပြည်ပနဲ့ ဆက်သွယ်တဲ့အခါအယ်လ်စီတောင် ဘယ်လိုဖွင့်ရမလဲ၊ ဘယ်လိုစစ်ရမလဲဆိုတာ မသိကြတော့ဘူး။ မြန်မာနဲ့ကုန်သွယ်မှုလုပ်တဲ့သူ တိုင်း ပေးမှ ရမယ်ဆိုတာ ပြည်ပကုန်ရောင်းချသူတွေ တော်တော်သိနေကြပါပြီ။သက်ဆိုင်ရာက မြန်မာကုန်သည်တွေ ရင်ဆိုင်နေရတဲ့ အနေအထားကိုလည်း ထည့်သွင်းစဉ်းစားသင့်ပါတယ်။

"တတိယပဲ့တင်သံကတော့ ကုန်သည် ဆီက မဟုတ်ပါဘူး။ စားသုံးသူ ပြည်သူတစ်ဦးဆီကပါ။ သူကတော့" ကျွန်တော် တို့ ကုန်ပစ္စည်းတွေ ပြည်ပပို့ရင် သက်ဆိုင်ရာက အလေးချိန်၊ အရည်အသွေးစစ်ဆေးချက်၊အသုံးပြုပုံကို နိုင်ငံတကာသုံး အင်္ဂလိပ် လို ဖေါ်ပြချက်။ (ဒါမှမဟုတ် ၀ယ်သူနိုင်ငံသုံးဘာသာစကား)စတာတွေမလွဲမသွေ ပေးရပါတယ်။ အခုတော့ ပြည်ပက တရားဝင် တင်သွင်းခဲ့တဲ့ ပစ္စည်းမှာတောင် တချို့ဆိုရင် QCpass တောင်မပါပါဘူး။ owner instruction ကလည်း သူတို့ဘာသာနဲ့ ရေးထားတာ၊ အင်္ဂလိပ်လိုမဟုတ်ဘူး။ ပထမဆုံးသုံးတာဆိုရင် ဘာသာပြန်တာက အလုပ်တစ်ခုဖြစ်နေတယ်၊ ကျွန်တော်ထင်ပါတယ် ဒါတွေကိုတော့သက်ဆိုင်ရာက စစ်ဆေး သင့်တယ်ထင်တယ်။ ဒါမှမဟုတ်ရင် ကျွန်တော်တို့ နိုင်ငံဟာသူတို့ရဲ့ တတိယတန်းစားပစ္စည်းတွေ dumping လုပ်တာခံနေရသလိုမျိုး ဖြစ်နေပါလိမ့်မယ်" ။

စတုတ္ထပဲ့တင်သံကတော့ ခံစားချက်တစ်ခုပါ။ ယှဉ်ပြိုင်နိုင်စွမ်းအား (competitivenessျ)နဲ့ ဆိုင်ပါတယ်။သူကတော့ သူ့ခံစားချက်ကိုပဲ ပြောပြတာပါ။ ဘာလုပ်သင့်တယ်၊ ညာလုပ်သင့်တယ် မပြောပါ။ "ကျွန်တော်တို့က စီးပွားရေးကို တရားဝင် လုပ်နေတာပါ။ မှတ်ပုံတင်တယ်၊ အခွန်ဆောင် တယ်၊ သွင်းလာတဲ့ ပစ္စည်းပေါ် ကုန်သွယ်ခွန်၊ အမြတ်ခွန်၊ ရောင်းခွန်၊ နှုတ်ဖြတ် အခွန်၊ အကုန်ဆောင်ရပါတယ်။ ဒါပေမဲ့ ကျွန်တော်တို့ သွင်းတဲ့ပစ္စည်းမျိုးကို အောက်လမ်း(မှောင်ခို)က သွင်းလာတဲ့သူတွေက တော့ ဒီအခွန်အားလုံး မဆောင်ရပါဘူး။ ကုမ္ပဏီမရှိတော့ အမြတ်ခွန်လည်း မပေးရဘူး။ ဒီပုဂ္ဂိုလ်တွေ အများစုကတော့ မြန်မာနိုင်ငံမှာ ပန်းပန်လျက် ရှိနေဆဲပါ။ ကျွန်တော်တို့ တရားဝင်စီးပွားရေးလုပ်သူတိုင်း သူတို့နဲ့ဘယ်လိုမှ မယှဉ်နိုင်ပါဘူး"။

နောက်ဆုံးပဲ့တင်သံက စီးပွားရေးဝန်းကျင် (business enviroment)တစ်ခုကို မီးမောင်းထိုးပြလိုတာပါ။ "ကျွန်တော်တို့ ဆီမှာ စီးပွားရေးလုပ်ရန်ဆိုပြီး တရားဝင်နေထိုင်ခွင့်နဲ့နေတဲ့ နိုင်ငံခြားသားတွေ ရှိပါတယ်။ တချို့က နေထိုင်ခွင့်ဗီဇာ မရှိဘူး။ ပြန်အထွက်ကြမှ overstay တစ်ရက် (၃)ဒေါ်လာဆောင်ပြီး မှပြန်ထွက် ကြတာ။ သူတို့ဟာ မြန်မာထောင်ထားတဲ့ ကုမ္ပဏီတွေမှာ လုပ်တယ်ဆိုပြီး တင်ပြကြပါတယ်။ ဒါပေမဲ့တချို့ ကတော့ သူတို့ပဲ မြန်မာနိုင်ငံသားနာမည်နဲ့ ထောင်ထားတာပါ။ အထူးသဖြင့် တဲ့တဲ့ပြောရရင် ပဲမျိုးစုံပြည်ပ တင်ပို့တဲ့ လုပ်ငန်းတွေမှာ အများဆုံးပါ။ သူတို့တွေဟာ အခွန်လုံးဝမဆောင်ပဲမြန်မာနိုင်ငံပဲလုပ်ငန်း ကနေ အကျိုးအမြတ်တွေ ရနေကြပါတယ်။ မြန်မာပဲကုန်သည်တွေ ဒီအကြောင်းတွေကိုသိကြပါတယ်။ တချို့ဆိုရင် မြန်မာမှာ အနေကြာလို့ ပွဲစားတောင်လုပ်နေကြပါတယ်။ နှစ်စဉ် မြန်မာပဲဈေးကွက် ကမောက်ကမ ဖြစ်ရတာဟာ ဒီလူတွေဖန်တီးချက် ရာခိုင်နှုန်းတော်တော်များများ ပါနေပါတယ်။

ဒီနိုင်ငံခြားသားတွေ လုပ်ကိုင်ခွင့်ပြုတယ်ဆိုရင် တရားဝင် နေခွင့်ပေး၊ အခွန်ကို လည်းတရားဝင်ဆောင်စေ သင့်ပါတယ်။ withholding tax လိုမျိုး ဒီလိုနိုင်ငံခြားသားတွေထံက ကောက်ခံသင့်တယ်လို့ထင်ပါတယ်"။

ကဲ စာဖတ်သူများခင်ဗျား။ ဒီဆောင်းပါးမှာပါဝင်တဲ့ စီးပွားရေးပဲ့တင်သံအချို့ကို စီးပွားရေးသမားတွေဆီကရခဲ့ တာ ပါ။ သူတို့ ရင်ထဲကလာတဲ့ ပဲ့တင်သံတွေကိုတော့ နားထောင်သင့်တယ် ထင်ပါတယ်။ media တွေရဲ့ တာဝန်တစ်ခု အနေနဲ့ ဒါမျိုးတွေ ရှာဖွေတင်ပြရတာဟာ တိုင်းပြည်စီးပွားရေး တိုးတက်စေလိုတဲ့ စေတနာပါ။ သက်ဆိုင် သူ တွေ stakeholders ၊ ၀ိုင်းနားထောင်သင့် တယ်၊ သုံးသပ်သင့်တယ်လို့ ထင်ပါတယ်။